Sérkennilegt.

Það er auðvitað ekki gott að geta ekki skipt um íbúð þegar maður vill og eða þarf. Þetta getur samt varla verið nema lúxusvandamál miðað við mörg önnur um þessar mundir.

Mér finnst það vera alvarlega vandamál ef drengurinn hennar fær ekki þjónustu og aðstoð við hæfi. 

Það er líka hægt að nota stofuna sem svefnstað. Hvað skyldu margir, bæði hjón og einstaklingar hafa notað stofuna fyrir sig en eftirlátið börnunum svefnherbergið? Þeir eru ansi margir.

Stundum er líka hægt að skipta herbergjum í tvennt eða stúka af í stofu.

Mér finnst Rakel líka fullsvartsýn þegar hún talar um að vera föst þarna í 35 ár. Ég hef enga trú á því, en ef svo illa færi þá verður íbúðin hæfilega stór.

En ég er algjörlega sammála að þessi eignaupptaka sem á sér stað þarna er algjörlega óþolandi og kallar á viðbrögð strax.

Föst í of lítilli íbúð

Halló Geir, vaknaðu

Geir segir að Samfylkingin stjórnist af hatri á einum manni. Hann segir að Seðlabankinn eigi enga sök.

Það var Seðlabankinn sem hélt stýrivöxtum uppi og gerði þar með eftirsóknarvert að eiga krónur. 

Seðlabankinn hélt gengi Íslensku krónunnar uppi sem hafði þær afleiðingar að erlendur gjaldeyrir var á útsölu sem aftur gerði það að verkum að fólk keypti og keypti.

Það var Seðlabankinn sem dró úr bindiskyldu bankanna.

Seðlabankinn bannaði fjármálafyrirtækjum að gera upp í Evrum sem virkaði hvetjandi fyrir þá að gambla með krónuna.

Seðlabankanum mistókst það hlutverk sitt að halda verðbólgu niðri.

Sjálfstæðisflokkurinn lét það óáreitt með afskiptaleysi að pallbílar væru fluttir inn í fáránlegu magni til einkanota. Bílar sem báru lægri gjöld vegna þess að þeir voru flokkaðir sem atvinnutæki. Þessir bílar voru svo í ofanálag bensínhákar hinir mestu sem kallaði á enn meira útstreymi á gjaldeyri vegna eldsneytiskaupa.

Árni Matt heykti sér af þeirri snilld sem honum fannst vera. Því þetta gerði það að verkum að fleiri krónur streymdu í ríkiskassann í formi virðisaukaskatts.

Það var Sjálfstæðisflokkurinn sem keyrði hér allar framkvæmdir úr hófi fram á methraða, enda er niðurstaðan sú að bara í byggingariðnaðinum er búið að vinna þá vinnu sem hefði dugað okkur í 2-3 ár.

 

Geir óttast sundrung og misklíð

Ó Geir ó Geir.

Þessi ummæli Geirs segja betur en þúsund orð um hvað hann er veruleikafirrtur.

Ísland er komið á hausinn undir hans stjórn, einfalt. Eftir hrunið fékk hann og hans ríkisstjórn tíma til að sannfæra okkur um að þau  hefðu tök á aðstæðum. Ekkert benti til þess að svo væri. Þvert á móti virtist allt fara úrskeiðis sem á annað borð gat farið úrskeiðis. Hvað eftir annað kom Geir fram fyrir fréttamenn og sagði að "á morgun" yrðu gjaldeyrismálin komin í lag. Síðar talaði hann um "eftir helgi".

Þau hafa líka sagt hvað eftir annað, að þau þyrftu að vera duglegri við að upplýsingum um eigið ágæti á framfæri, sagst vera að gera svo miklu meira en fólk héldi. Þau hafa ekki einu sinni gert það.

Fyrir síðustu kosningar lagði Sjálfstæðisflokkurinn ofuráherslu á getu sína og hæfni í fjármálum. Áralangur áróður þeirra hafði gert það að verkum að ég og fleiri var farin að trúa því að engum væri betur treystandi fyrir peningamálunum. 

Markmið Seðlabankans hafa EKKI gengið eftir. Þegar maður les það sem skrifað er um tilgang og markmið þeirrar stofnunnar og ber það svo saman við raunveruleikann þá er það alveg klárt að sú stofnun hefur ekki staðið sig. Það er ævintýralegur munur á markmiðum og útkomu.

Nei takk, ekki fleiri ár í bili allavega með Sjálfstæðisflokkinn í stjórn. Það er heldur ekki hollt neinum flokki hversu góður sem hann annars kann að vera, að vera svona lengi í stjórn samfellt.

 

Geir: Stjórnuðust af hatri

En ekki hvað?

Geir Haarde reyndi að telja okkur trú um að lán Alþjóðagjaldeyrissjóðsins væri háð því að hann og hans lið væri við stjórn. Ég trúði því ekki og ég þekki ekki einn sem trúði því.

Annars er það mjög sorglegt hvernig Geir endar feril sinn í pólitík, hrökklast frá með sk,,,, og skömm.

IMF: Áætlunum sé fylgt eftir

Enn eitt ruglið í Geir.

Geir hefur haldið því fram að öll hugsanleg aðstoð við Íslendinga væri í uppnámi ef skipt yrði um stjórn.

Hann talaði alltaf eins og aðstoð IMF yrði veitt honum persónulega.

Nú heldur Þorgerður Katrín hræðsluáróðrinum áfram og segir kosningar, þó óumflýjanlegar séu, lengja kreppuna um allt að tvö ár. 

Nei takk Sjálfstæðismenn, nú dragið þið ykkur í hlé.

Stjórnarskipti breyta engu

Þau ætla bara ekki að ná þessu.

Þetta er ekki nóg. Ríkisstjórnin verður að víkja nú þegar, einfalt.

Skipa þarf utanþingsstjórn einhvers konar starfstjórn sem væri þá við völd fram að kosningum.

Skipta þarf út í Seðlabanka og Fjármálaeftirlitinu, núna.

Þorgerður leysir Geir af

Andstyggilegt fyrir Geir en..

Þetta er auðvitað áfall fyrir Geir og vonandi kemst hann yfir þetta. En um leið opnast honum leið út án þess að hann þurfi að játa nokkuð á sig. Hann er bara veikur og fer, löglega afsakaður.

Ég vona að honum gefist ráðrúm í veikindafríinu til að horfa yfir farinn veg og sjá hvaða þátt hann og hans fólk eiga í þessum ósköpum og síðan biðji hann okkur afsökunar.

Ég vil nefnilega ekki slá því föstu að hann hafi vitað hvert stefndi án þess að gera nokkuð, þaðan af síður að hann hafi tekið þátt í þessu vitandi vits.

Af tvennu illu er skárra að maðurinn sé vanhæfur vegna getuleysis heldur en illgirni.

Sjálfstæðismenn í sjokki

Hvernig geta mótmæli snúist andhverfu sína!!!! verða þau þá að meðmælum?

"þið megið mótmæla, bara ekki vera með læti og ekki trufla mig"

Þau þykjast skilja reiðina, þau þykjast virða rétt fólksins til að mótmæla,,,,en bara ekki ganga of langt. Þetta er orðin svo þvælin tugga að manni verður illt.

Þau hefðu betur gætt þess sjálf að ganga ekki of langt, í getuleysi.

Þau hvorki heyra né skilja kröfuna um að fólkið vill þau burt.

Ég vil þau í burtu vegna þess að ég treysti þeim ekki. Þau sváfu á verðinum og sinntu ekki þeim aðvörunarbjöllum sem þó glumdu út um allt. 

Mótmæli mega ekki snúast upp í andhverfu sína

TIL HAMINGJU FRAMSÓKN

Fyrst Framsóknarmenn höfðu vit, kjark og þor til að að kasta gamla liðinu í burt og kjósa sér Sigmund sem formann, þá eiga þeir von.

Ef flokksmenn hinna flokkanna gera slíkt hið sama, þ.e. að kasta gamla liðinu í burtu þá á Ísland von.

Sigmundur kjörinn formaður

Ætli Davíð viti af þessu?

Óli þó. Hvað heldurðu að Davíð segi þegar hann fréttir af þessu? Ekki trúi ég því að hann hafi gefið hagfræðingunum sínum leyfi til að haga sér svona.

Mótmælendum ógnað á gamlársdag

Hvað þarf almenningur að gera?

 
Björn Bjarnason lenti í því, nú í vikunni að eggjum var kastað í ráðherrabílinn hans. Hann hafði orð á því á heimasíðunni sinni
_"Á /mbl.is/ er sagt frá því, að samtökin Nýir tímar hafi staðið fyrir þessum aðgerðum við þinghúsið en þau berjist fyrir því að ríkisstjórnin víki og tímabundin þjóðstjórn verði skipuð. Að það markmið náist með því að kasta eggjum í ráðherrabíla, finnst mér ólíklegt."_

Ég er alveg sammála Birni, en hvaða aðgerðir eru líklegar til árangurs? Hvað þarf fólk sem er þessarar skoðunar að gera, til að Björn taki mark á því.
Fólk skrifar greinar í blöð, hringir inná útvarpsstöðvar, bloggar sér til óbóta, fundar úti og inni út um allan bæ og ég veit ekki hvað og hvað. Ekkert virðist duga, menn vilja ekki hlusta.
Eru einhverjar reglur eða lög um það að t.d. ákveðinn hluti kjósenda geti með undirskriftum farið fram á kosningar? Gerir lýðræðisríkið kannski ekki ráð fyrir því að almenningur geti afturkallað umboð sitt ef því finnst illa farið með það?

Vantrauststillaga komin fram

Ný stefna í heilbrigðismálum.

Nú þarf að taka upp nýja siði.

Stefna ber að því að koma öllum Íslendingum sem mögulegt er,  til heilsu eins fljótt og unnt er og burt með alla biðlista.

Svo gerum við heilbrigðisþjónustuna út. Útrásarliðið getur þá farið út um allan heim og sótt sjúklinga til að koma með til lækninga á Íslandi.

Það er að segja ef einhver treystir þeim þá. Ef ekki þá fáum við aðra í það. Með því móti getum við fengið gjaldeyri til landsins um leið og við vinnum okkur í áliti á nýjum grunni.

Auðmaður skoðaði skurðstofur

Hvort er mikilvægara traust eða ímyndaður stöðugleiki?

Sjálfstæðismenn hætta aldrei að koma manni á óvart. Núna segja þeir ekkert vera mikilvægara en að það ríki stöðugleiki í kring um helstu stofnanir landsins og þess vegna má ekki hrófla við neinum,þar með ekki þeim sjálfum.

Við þessar aðstæður er TRAUST mikilvægast af öllu. Almenningur þarf að treysta stjórnvöldum og stofnunum. Það er ekki síður mikilvægt að ríkisstjórn Íslands njóti trausts þeirra ríkja sem ætla að hjálpa okkur út úr þessum ósköpum með því að lána okkur peninga.

Við getum rétt ímyndað okkur hvaða orð Sjálfstæðismenn  hefðu látið falla ef vinstri stjórn væri í landinu. Því eftir því sem Sjálfstæðismenn segja þá "gerðist þetta bara"  Hamfarirnar komu eins og þruma úr heiðskýru lofti og enginn hefði getað komið í veg fyrir það.

Mér er sem ég sæi Sjálfstæðismenn bíða rólega og gefa þeirri stjórn vinnufrið.  

 

Hissa á ummælunum

Mikið rosalega er ég orðin þreytt á þessu.

Hvað þarf til þess að koma þessu fólki í skilning um að það hefur ekki lengur umboð? Björn Bjarnason sagðist ekki telja eggjakast líklegt til árangurs og ég er algjörlega sammála honum með það. En þá spyr ég hvað er líklegt til árangurs?

Fólk skrifar greinar í blöð, heldur fundi úti og inni, bloggar sig máttlaust, sendir þingmönnum tölvupóst, hringir í símatíma útvarpsstöðva og ég veit ekki hvað og hvað.

Ekkert dugar. Síðast í gær heyrði ég Geir segja að stutt sé frá síðustu kosningum þar sem núverandi ríkisstjórn hafi fengið skýrt og öruggt umboð til fjögurra ára, frá kosningum að telja. 

Halló, umboðið hefur verið afturkallað. 

Almenningur treystir ykkur ekki lengur, vill ykkur burt, vill hleypa nýju fólki að.

Það er gripið til allskonar líkinga," ekki skynsamlegt að skipta um hest í miðrið á". Við venjulegar aðstæður á það fyllilega við, en hvað ef hrossið sturlast í miðri á og hættir við að fara yfir, berst með straumnum og stefnir fram af fossbrún? Nú eða hrossið er bara dautt? Þá þarf að skipta. 

Svo koma Geir og Björgvin fram í glansþáttum þar sem þeir hreykja sjálfum sér fyrir ósérhlífni og mæra sjálfa sig í bak og fyrir. Eflaust kaupa þetta einhverjir en ég segi fyrir mig, mér verður illt. 

 

Nú er það svart lagsmaður.

Þetta er það sem ég óttast mest. Þeir sem eru líklegastir til þess að fara eru einmitt þeir sem við megum síst við því að missa. Ungt fólk með börn og fólk á besta aldri með mestu stafsorkuna.

Þetta er einmitt það fólk sem ríkisstjórnin hefur lagt á þyngstu byrðarnar. 

Nú hefur ríkisstjórnin tilkynnt "björgunarpakka fjölskyldunnar" og það kemur í ljós að ekkert, akkúrat ekkert eigi að gera til að létta venjulegum fjölskyldum lífið. Eftir sem áður verður ekkert hreyft við verðtryggingunni, hún mun halda áfram óáreitt í þeirri óðaverðbólgu sem framundan er. Eignirnar rýrna í verði um allt að 50% segja svörtustu spár, á meðan lánin hækka upp úr öllu valdi. 

Þá sér fólk auðvitað engan tilgang með því að berjast hér áfram, án þess að eiga von um að uppskera árangur erfiðisins og fer.

 

Ásókn í störf í útlöndum