Gæfudagur.

Þessi hjátrú varðandi föstudaginn er byggð á misskilningi, allavega hjá kristnu fólki.

Í síðustu kvöldmáltíð Jesú sátu þrettán manns við borðið, að því að talið er, og svo var hann krossfestur á föstudegi. Þegar þetta tvennt fer svo saman á að vera hætta á meiriháttar ógæfu.

Menn virðast gleyma því að Jesú dó fórnardauða á krossinum, hann var ekki myrtur. Til þess að frelsun manna frá syndum þeirra gæti átt sér stað varð Jesú  að láta lífið með þessum hætti. Hann tók á sig allar heimsins syndir hvorki meira né minna (hvernig svo sem það er hægt). Þetta er lykilinntak kristinnar trúar.

Þess vegna ætti þetta að vera hinn mesti gæfudagur. 

 

Ps. Ég er ekki trúuð, því miður .

Minna um óhöpp á föstudaginn 13. en aðra föstudaga

Skrítið

Alþingismaður  brýtur alvarlega af sér í trúnaðarstarfi, hlýtur óskilorðsbundinn fangelsisdóm, situr hann af sér og er umsvifalaust kominn aftur á þing.

Embættismenn og ráðherrar brjóta lög við sölu á Íslenskum Aðalverktökum, Hæstiréttur dæmir, enginn axlar ábyrgð, enginn missir vinnuna. Þeir voru svo óvanir greyin, þeim gengur vonandi bara betur næst.

Jón Ásgeir er hundeltur í sex ár, niðurstaðan ein sú aumlegasta sem um getur miðað við hvað lagt var upp með. Hans dómur er skilorðsbundinn. Honum er meinað að sitja í stjórnum eigin fyrirtækja.

Þetta finnst mér bæði ósanngjarnt og skrítið. 

Kemur ekki á óvart.

 Enginn staður hefur enn misst sitt tóbakssöluleyfi þrátt fyrir að hafa verið uppvís að því að selja börnum undir aldri tóbak.

Það verður spennandi að fylgjast með því hvort einhver þessara staða missi leyfið.

Þegar Sigurður Kári hefur mælt með því að matvöruverslanir fái að selja áfengi þá talar hann um hvað það gangi ljómandi vel með tóbakið, það er að virða reglur um lágmarksaldur.

Held að hann ætti að kynna sér málið aðeins betur. 

Meirihluti sölustaða í Hafnarfirði selur unglingum tóbak

Flott saman

Ég held að saman myndu Obama og Hillary mala kosningarnar. Þau myndu líka slá vopnin úr höndum republikana.

Það væri frábært bæði fyrir Bandaríkin og rest, að fá blökkumann sem forseta og konu sem varaforseta.

Obama tryggir sér útnefningu

Guði sé lof,

Hvort eiga nú smiðirnir sem eru nýbúnir að missa vinnuna sína eða eru við það að fá uppsagnarbréf,  að þakka Guði fyrir skjálftann eða eiga Sunnlendingar eigi að þakka Guði fyrir samdráttinn á byggingamarkaðnum sem gerir það að verkum að smiðir eru á lausu ? 

Allavega er það alveg klárt að þessi skjálfti kom eins og eftir pöntun ef hann hefur á annað borð þurft að koma.  

Snarpur kippur á Hellisheiði

Málið er í rauninni sáraeinfalt.

Hvað er svona flókið við þessi eftirlaunalög ? Þau hefði í það fyrsta aldrei átt að verða til en fyrst menn (það var víst engin kona formaður þá)  létu hafa sig út í að samþykkja þennan ósóma þá eiga þeir að sjá sóma sinn í því að fella lögin úr gildi.

Á meðan málið velkist á milli formanna flokkanna þá fjölgar þeim sem eignast rétt til að fá greitt eftir þeim, fleiri mynda eignarétt og útkoman er ; meiri útgjöld fyrir okkur.  

Það er ekkert sem réttlætir að þingmenn búi við önnur og betri lífeyriskjör en aðrir ríkisstarfsmenn. Mér skilst reyndar að ríkisstarfsmenn sitji ekki allir við sama borð hvað varðar lífeyrisréttindi en það ætti þá frekar að jafna það heldur en að búa til einn einn flokkinn.

Þingmenn eru jú bara ríkisstarfsmenn. 

Því hefur verið borið við að fólk sem alla sína starfsæfi hefur verið á þingi geti lent í svo miklum vandræðum með að fá sér nýja vinnu ef það svo dytti út af þingi og þess vegna verði það að njóta sérkjara.

Það var þá, segi ég nú bara.

Í fyrsta lagi þá er það hvorki þjóðinni né þingmanni hollt, að eyða allri sinni starfsæfi á þingi,

í öðru lagi þá ætti sá sem hvergi getur fengið vinnu annars staðar EKKI að vera á þingi og

í þriðja lagi,  þá er það  bara þannig  með "venjulegt" fólk sem missir vinnuna þegar það er rúmlega fertugt svo ekki sé talað um fólk sem komið er yfir fimmtugt, að það á frekar erfitt með að fá vinnu. Þeir sem hafa verið í eigin rekstri segja að það sé nánast útilokað fyrir það að fá vinnu.

Velkomin til jarðar.

Fagnar endurskoðun eftirlaunalaga

Eru ALLIR velkomnir til Íslands ?

Þeir sem vilja vera góðir, hugsa fallega og breyta rétt segja að allir séu velkomnir til Íslands. Þeir bæta ekki einu sinni við "á meðan húsrúm leyfir" eins og var svo oft tekið fram í auglýsingum hér í gamla daga þegar um mannfagnaði var að ræða.

Þeir sem vilja vera góðir segja að við eigum ekki að fara í manngreiningarálit, allir séu jafnir og þess vegna eigum við að taka á móti ÖLLUM sem vilja koma.

En meinar fólk þetta í alvörunni?  Ég held ekki.  

Úti í hinum stóra heimi er nefnilega líka vont fólk, fólk sem leggur sig í framkróka við að vera vont við annað fólk. Það vílar ekki fyrir sér að drepa annað fólk, nágranna sína, konur og börn og pynta það á alla kanta. 

Viljum við fá það fólk ? er það líka velkomið. Ég held ekki.

Við gerum upp á milli manna alla daga. Jón og séra Jón fá ekki sömu meðferð í dag frekar en fyrr á árum og skiptir þá engu hvort um er að ræða Íslending eða útlending. Gott dæmi um það er Bobby Fisher. Íþróttamenn hafa líka ansi oft fengið flýtimeðferð þegar kemur að ríkisborgararétti því það kemur sér svo vel fyrir okkur að fá góða menn í liðið.

Þeir sem hafa hæst um að við ættum að taka á móti öllum eru ekki að mælast til þess að við tökum á móti þeim sem eru í mestri þörf fyrir aðstoð, fátækasta fólkinu, þeim sem eru alvarlega sjúkir eða fatlaðir. Ónei það fólk sem kemur hingað til okkar er alveg sérvalið, stundum er einn og einn alvarlega veikur hafður með svona eins og til að friða samviskuna. 

Í heiminum öllum búa rúmlega sex milljarðar manna þar af þjáist að minnsta kosti um það bil einn milljarður af hungri. 

Víða í heiminum eru endalausir bardagar og stríð sem virðast engan endi ætla að taka, þar við bætast náttúruhamfarir af öllu tagi. Það er ekki séns að við getum bjargað öllum en auðvitað getum við bjargað sumum og fyrir þá er það allt sem máli skiptir.

Þess vegna þurfum við að vanda okkur sérstaklega, við þurfum líka að leggja okkur meira fram við að hjálpa fátæku og hrjáðu fólki sem er hér heima hjá okkur, fólki sem hefur farið halloka af ýmsum ástæðum. Það fólk á líka sinn rétt.

Því  þó svo það hafi fæðst í landi alsnægtanna þá er ekki þar með sagt að það njóti þeirra líka.

Sérkennileg niðurstaða.

Danskt greiningarfyrirtæki virðist komast að þeirri niðurstöðu að það sé ekki alltaf til bóta að hafa konu sem leiðtoga í fyrirtækjum.

Samt segir í þessari niðurstöðu að hluti skýringarinnar gæti verið sá að karlar stykkju frá borði þegar tap yrði á rekstri eins og könnun innan tölvugeirans hefur leitt í ljós.

" Þá skapist rými fyrir konurnar í stjórnum fyrirtækjanna. Karlarnir snúi hins vegar aftur þegar reksturinn er kominn á réttan kjöl og tími kominn til að færa út kvíarnar."

Bíddu nú við, hvernig nýta konurnar þetta "rými" ? kemst reksturinn á réttan kjöl af sjálfum sér ? 

 

 

  

 

Konur ekki alltaf kostur

Klukkuna vantar tíu mínútur í eitt að nóttu og enn eru tíu þingmenn á mælendaskrá.

Ég er að horfa á umræður á Alþingi okkar Íslendinga. Þrátt fyrir að hver þingmaðurinn á fætur öðrum mótmæli því að þingfundi sé haldið áfram um jafn mikilvægt mál og grunnskólalögin heldur forseti þingsins sínu striki.

Þrátt fyrir að athugasemdum og spurningum rigni yfir forseta þingsins þá kýs hann að svara ekki, það eina sem hann hefur til málanna að leggja er að biðja þingmenn um að virða tímamörk. 

Þvílíkt virðingarleysi við þingmenn og aðra landsmenn.  

Heilsuleysi unga fólksins.

Ég las í einhverju blaði í dag að það væri áberandi hvað ungt fólk væri oftar frá vinnu vegna veikinda en eldra fólk.

Sumir halda því meira að segja fram að það sé vegna þess að yngra fólk væri ekki jafn samviskusamt og tæki sér því "sína veikindadaga".

Ég er ekki viss um að svo sé það getur vel verið að svo sé í einhverjum tilfellum. 

Ég man það bara að þegar ég var ung, þá náði ég mér í nánast allar þær pestir sem gengu í það og það skiptið það var alveg ferlegt.

En svo þegar ég var 24 ára hætti ég nánast að vera veik, eða þannig. Kannski hafði það eitthvað með það að gera að þá eignaðist ég barn en eins og allir vita þá geta mömmur með lítil börn ekki verið veikar eða bara ég var þá loksins komin með þokkalegt ónæmiskerfi.

Síðan þá (eru liðin ótrúlega mörg ár) hafa liðið ca. 4-5 ár á milli pesta hjá mér(7,9,13) svo fæ ég jú einstaka kvef og særindi í háls, en það tel ég ekki með.