Siðferði

Stjórn Landsambands kvenna í Frjálslynda flokknum samþykkti í kvöld ályktun þar sem seta Margrétar Sverrisdóttur í borgarstjórn er hörmuð. Stjórnin segist í ályktuninni lýsa vantrausti á Margréti.

Ályktun LKF:
Stjórn Landsambands kvenna í Frjálslynda flokknum, harmar að sundrung skyldi verða í Frjálslynda flokknum s.l. vetur þegar Margrét Sverrisdóttir og nokkrir stuðningsmenn hennar kusu að segja sig úr Frjálslynda flokknum eftir að hafa tapað í varaformannskjöri fyrir Magnúsi Þór Hafsteinssyni.

Landssamband kvenna í Frjálslynda flokknum bendir á að Margrét Sverrisdóttir benti réttilega á hversu óeðlilegt það er að kjörinn fulltrúi stjórnmálaflokks skipti um flokk á miðju kjörtímabili og sitji áfram í þeirri trúnaðarstöðu sem hann var kosinn til upphaflega. Þegar Gunnar Örlygsson sem kosinn var á alþingi fyrir Frjálslynda flokkinn gekk í Sjálfstæðisflokkinn lýsti Margrét Sverrisdóttir því yfir að þetta væri bæði ólöglegt og ósiðlegt að Gunnar skyldi ætla að halda þingsætinu sem með réttu tilheyrði Frjálslynda flokknum. Hún kærði athæfi Gunnars síðan til umboðsmanns Alþingis.

Nú er Margrét Sverrisdóttir í sömu stöðu og situr áfram í sæti sem tilheyrir Frjálslynda flokknum í borgarstjórn Reykjavíkur þó hún hafi sagt sig úr flokknum. Það er sama siðleysið og hjá Gunnari Örlygssyni á sínum tíma.

Landssamband kvenna í Frjálslynda flokknum lýsir vantrausti á Margréti Sverrisdóttur og öll vinnubrögð hennar þar sem hún gékk úr flokknum en situr samt í umboði hans
í borgarstjórn. Margrét var ekki kosin persónukjöri heldur voru það atkvæði flokksins, sem veittu henni setu sem varamanni í nafni Frjálslynda flokksins.

Landssamband kvenna í Frjálslynda flokknum skorar á Margréti Sverrisdóttur að fylgja því siðferði sem hún áður boðaði að ætti að gilda í stjórnmálum og segja af sér sem varaborgarfulltrúi þannig að raunverulegur fulltrúi Frjálslynda flokksins setjist í borgarstjórn í stað þeirra sem farnir eru úr flokknum.

Borgarstjórnarflokkur Frjálslyndra og óháðra er óviðkomandi Frjálslynda flokknum meðan fulltrúar annarra flokka en Frjálslynda flokksins sitja sem fulltrúar flokksins á fölskum forsendum. Framkoma Margrétar Sverrisdóttur og tækifærismennska vegna eigin hagsmunagæslu er ekki traustvekjandi fyrir ungar konur sem vilja taka þátt í pólitík og ekki hvetjandi fyrir konur að horfa á vinnubrögð hennar að sitja umboðslaus í borgarstjórn. Margrét Sverrisdóttir situr ekki fyrir og er á engan hátt tengd Frjálslynda flokknum.

Athugasemdir

[Ásthildur Cesil Þórðardóttir, 16.10.2007 kl. 00:49]

Sammála þessu.

[Kolgrima, 16.10.2007 kl. 01:22]

Á það alltaf við? Fenguð þið ekki mann frá Framsókn?

[Guðrún María Óskarsdóttir., 16.10.2007 kl. 02:03]

Takk Þóra.

Vek ábyggilega einnig athygli á þessari ályktun.

kv.gmaria.

[Þóra Guðmundsdóttir, 16.10.2007 kl. 07:52]

Mér finnst þetta eiga alltaf við  á meðan við merkjum x vð flokka en ekki einstaklinga.

[Guðrún Þóra Hjaltadóttir, 16.10.2007 kl. 08:36]

Kolgríma, Maðurinn sem þú talar um "frá Framsókn", var á FF listanum í síðust kosningum.

Hann telst því rétt kosin á þing.

Margret sagði sig úr flokknum og er faraformaður í öðrum flokki, það er Íslandshreyfingunni.

[Jón Halldór Guðmundsson, 16.10.2007 kl. 22:50]

Ég leyfi mér að benda á að Margrét var á lista Íslandshreyfingarinnar í síðustu alþingiskosningum.  Kjörtímabil sveitarstjórna er 4 ár og endar ekki við næstu alþingiskosningar. Það eru einhver dæmi um að fólk bjóði sig fram á lista annars flokks, einkum í sveitarstjórnarkosningum, einkum ef flokkur manns á ekki aðild að framboði.

Ég tel ályktun frjálslyndra kvenna móralska ábendingu til Margrétar, sem hefur jú lýst því yfir að frjálslyndi flokkurinn sé ekki sá flokkur sem hún var liðsmaður í eftir að flokkurinn breytti áherslum í málefnum innflytjenda.  Þannig að, að öllu smanlögðu finnst mér að frjálslyndar konur ættu að sýna Margréti skilning og kannski mættuð þið hugleiða þessa spurningu: "Hvernig getum við aukið veg kvenna í flokknum okkar"?

[Þóra Guðmundsdóttir, 17.10.2007 kl. 21:59]

Konur í Frjálslynda flokknum hafa í rauninni sýnt Margréti ótrúlega mikið umburðarlyndi. Þær konur sem hafa verið í flokknum frá upphafi og studdu Margréti með ráðum og dáð hafa nú allar götur frá því Margrét sagði sig úr flokknum mátt sitja undir og þola ýmislegt af hennar hálfu. Hún hefur ekki látið neitt tækifæri ónotað til að hreyta leiðindum og ónotum í sína fyrrum flokksfélaga.